AlbKristian.com - Faqe të Krishtera Shqiptare

Kryefaqja

 

V. Antikrishti

“Dhe unë do të shtie armiqësi midis teje dhe gruas, midis farës sate dhe farës së saj; fara e saj do të shtypë kokën tënde, dhe ti do të plagosësh thembrën e farës së saj” (Zanafilla 3:15). Ndërsa ky varg flet për Krishtin si fara e gruas, gjithashtu në mënyrë profetike e shpall Antikrishtin si fara e gjarprit. Fara e gjarprit, Antikrishti, është përmendur së pari në librin e parë të Biblës, është përshkruar plotësisht në librin e fundit të Biblës, mund të gjendet gjithashtu edhe në mes të Librit. Kjo është shumë kuptimplote.

A. Personi i tij.

Kisha e hershme mësoi që Nero ishte Antikrishti dhe që, kur ai do të vdiste, do të ringjallej prej së vdekurish. Në shekullin e njëmbëdhjetë valdensianët, husitët dhe uiklifët shpallën që Kisha Katolike Romake ishte Antikrishti, ndërsa Kisha Katolike Romake shpalli që Napoleoni ishte Antikrishti. Gjatë Luftës së Parë Botërore thuhej që Kaiser Vilhelm i Gjermanisë ishte Njeriu i Mëkatit. Mund të mendohet për shumë njerëz sikur janë Antikrishti, por hamendje të tilla janë të padobishme, sepse Antikrishti nuk do të shfaqet deri pas Rrëmbimit të Kishës (2 Thesalonikasve 2:1-12).

Ai është një njeri! “Këtu është urtia. Ai që ka mend, le të bëjë llogari numrin e bishës, sepse është numër njeriu dhe numri i tij është gjashtëqind e gjashtëdhjetë e gjashtë” (Zbulesa 13:18). Vini re që Shkrimi thotë që ai ka numrin e një njeriu. Numri i njeriut është 6. Perëndia thotë që numri i Tij është 6-6-6: ai është njeri; ai është njeri; ai është një njeri! Ai nuk është Kisha Katolike Romake, ai nuk është një sistem, ai është një njeri. Ai do të mbretërojë në Jeruzalem dhe jo në Romë.

1. Ai do të jetë një hebre. “Ai nuk do të tregojë respekt për Perëndinë e etërve të tij” (Danieli 11:37a). “Unë kam ardhur në emër të Atit tim dhe ju nuk më pranoni, po të vinte ndonjë tjetër në emër të vet, ju do ta pranonit” (Gjoni 5:43). Fjala “tjetër” do të thotë një tjetër hebre. Emri “Antikrisht” është një titull hebre, dhe hebrenjtë nuk do të pranojnë një johebre si Mesinë e tyre.

2. Ai do të jetë një gjeni. Përveç Jezus Krishtit, Ai do të jetë njeriu më i shquar që ka parë bota.

          a. Një gjeni intelektual. “Në fund të mbretërisë së tyre, kur rebelët do ta kenë mbushur kupën, do të dalë një mbret me pamje të egër dhe i rrahur në dredhitë luftarake” (Danieli 8:23). Shihni gjithashtu Ezekieli 28:3.

          b. Një gjeni gojëtar. “Ai do të vijë paqësisht, por do ta shtjerë në dorë mbretërinë me intriga” (Daniel 11:21b). Ai do të jetë një tallje dhe një imitim i Atij për të cilin u tha: “Njeriu kurrë nuk ka folur kështu”.

          c. Një gjeni sundues (drejtues). Ai ngrihet nga asgjëja deri në pushtet. Ai është “briri i vogël” për të cilin flitet tek Danieli 7 dhe 8 dhe “bisha” e Zbulesës 13 dhe 14. Të gjithë mbretërit do t’ia japin atij pushtetin e tyre.

          d. Një gjeni tregtar. Askush nuk do të jetë në gjendje të blejë ose të shesë pa vulën e tij. “Dhe iu dha t’i japë një frymë figurës së bishës, aq sa figura e bishës të flasë, edhe të bëjë që të gjithë ata të cilët nuk e adhuronin figurën e bishës, të vriteshin” (Zbulesa 13:17).

          e. Një gjeni ushtarak. “Dhe unë pashë dhe ja, një kalë i bardhë. Dhe ai që e kalëronte kishte një hark dhe atij iu dha një kurorë dhe ai doli jashtë si fitimtar dhe për të fituar” (Zbulesa 6:2). “Kush i ngjan bishës? Kush mund të luftojë kundër saj?’’ (Zbulesa 13:4).

          f. Një gjeni fetar. Ai kërkon që të adhurohet si Perëndi. “Kundërshtari, ai që lartëson veten mbi çdo gjë që quhet perëndi ose objekt adhurimi, aq sa të shkojë e të rrijë në tempullin e Perëndisë si Perëndi, duke e paraqitur veten se është Perëndi” (2 Thesalonikasve 2:4).

          g. Një gjeni financiar. “Do të shtjerë në dorë thesaret prej ari dhe argjendi dhe të gjitha gjërat e çmuara të Egjiptit, Libianët dhe Etiopasit do t’i shkojnë pas” (Danieli 11:43). Shihni edhe Ezekieli 28:4-5.

B. Titujt e Antikrishtit.

1. Njeriu i mëkatit. Ky titull është më i spikaturi ndër të gjithë titujt e tjerë të tij. Të gjitha mëkatet e njeriut do të mishërohen dhe do të bashkohen në të. “Askush të mos ju gënjejë kurrsesi, sepse ajo ditë nuk do të vijë, pa ardhur më parë rënia dhe pa u shfaqur njeriu i mëkatit, i biri i humbjes” (2 Thesalonikasve 2:3).

2. Biri i humbjes. Shkrimi i mësipërm e shpall atë gjithashtu si bir të humbjes (2 Thesalonikasve 2:3).

3. I Paudhi. “Ardhja e atij të paudhi do të bëhet me anë të veprimit të Satanit, bashkë me çudira, shenja dhe mrrekullish të rreme” (2 Thesalonikasve 2:8). Krishti është i drejti, Antikrishti është i paudhi.

4. Gënjeshtra. “E prandaj Perëndia do t’u dërgojë atyre një gënjim që do t’i bëjë të gabojnë, që t’i besojnë gënjeshtrës” (2 Thesalonikasve 2:11). Jezus Krishti është e Vërteta, Antikrishti është Gënjeshtra. Gjoni 8:44 thotë që Djalli është një gënjeshtar “dhe ati i saj”, domethënë, ati i gënjeshtrës.

5. Antikrishti. “Fëmijë, është ora e fundit. Dhe, sikurse e dëgjuat, antikrishti duhet të vijë dhe tani janë shfaqur shumë antikrishtë; prej nga e dimë se është ora e fundit” (1 Gjoni2:18).

6. Mbreti i Babilonisë. Babilonia është qendra e veprës së Satanit. Babilonia do të ripërtërihet në ditët e fundit dhe Antikrishti do të mbretërojë mbi të (Zbulesa 17 dhe 18).

7. Briri i vogël. “Nga një prej tyre doli një bri i vogël, që u bë shumë i madh në drejtim të jugut, të lindjes dhe të vendit të lavdishëm. Në fund të mbretërisë së tyre, kur rebelët do ta kenë mbushur kupën, do të dalë një mbret me pamje të egër dhe i rrahur në dredhitë luftarake” (Danieli 8:9, 23). Shihni gjithashtu Danieli 7:8.

8. Mbreti kokëfortë. “Pastaj mbreti do të veprojë si të dojë, do të lartohet, do të hyjnizohet përmbi çdo perëndi dhe do të thotë gjëra të habitshme kundër Perëndisë të perëndive; do të ketë sukses deri sa të mbushet kupa e indinjatës, sepse ajo që është dekretuar do të bëhet” (Danieli 11:36).

9. Bisha (Zbulesa 13, 17, 19).

C. Paraprijësit e Antikrishtit.

Disa nga paraprijësit e Antikrishtit janë dhënë në Shkrimet, të tjerë janë të nënkuptuar, domethënë jashtë Shkrimeve.

1. Kaini. Ai mohoi gjakun dhe ishte gënjeshtar dhe vrasës (1 Gjoni 3:12).

2. Nimrodi. Historia e tij parapriu thirrjen e Abrahamit për në Tokën e Premtuar. Antikrishti do të paraprij­ë thirrjen e farës së Abrahamit dhe do të hyjë në Tokën e Premtuar për herën e dytë. Nimrod do të thotë rebel. Ndërsa Shkrimet flasin për të si një gjuetar i fuqishëm, në të vërtetë ai nuk ishte një gjuetar kafshësh, por një gjuetar shpirtrash. Ai ishte një njeri i fuqishëm kundër Zotit. Kështu do të jetë edhe Antikrishti.

3. Sauli. Mbreti i Izraelit u kërkua nga populli, por ai ishte kundër të vajosurit të Zotit. Antikrishti do të jetë gjithashtu zgjedhja e popullit, por edhe ai do të jetë kundër të vajosurit të Perëndisë.

4. Absalomi. Absalom do të thotë ati i paqes, por edhe ky e mohoi atin e tij. Ai u paraqit si një njeri i paqes dhe u përpoq që të vidhte mbretërinë. Kështu do të veprojë edhe Antikrishti.

Absalomi	Antikrishti
Një njeri i bukurisë.	I njëjtë.
U përpoq ta fitonte mbretërinë me lajka.	I njëjtë.
I bëri një vend adhurimi vetvetes.	I njëjtë.
Pati një fund të dhunshëm.	I njëjtë.

5. Nebukadnetsari. Ai ishte sunduesi i parë botëror që u bë pararendësi i sunduesit të fundit të botës.

6. Antioku Epifan. Ky ishte njeriu i çmendur që plaçkiti Jeruzalemin, duke vrarë katërqind mijë hebrenj. Ai mori një dosë dhe e dogji mbi altar. Antikrishti, gjithashtu, do ta dhunojë altarin.

7. Aleksandri i Madh. Ai ishte i njohur si “pakënaqësi” (person që nuk të kënaq). Ishte një gjeni ushtarak dhe nuk pësoi kurrë humbje. Aleksandri i Madh kërkoi që të adhurohej si Bir i Perëndisë. E njëjta gjë do të ndodhë edhe me Antikrishtin.

8. Kaias Kaligula. Ky Perandor Romak u konsiderua si i çmendur. Me siguri, ai ishte i pushtuar nga një demon. Edhe Antikrishti do të jetë plotësisht i pushtuar nga Djalli.

9. Nero. Sa ishte gjallë, ai mendohej nga të krishterët e hershëm të ishte Antikrishti. Shumë besuan që, kur ai vdiq, do të ringjallej përsëri prej së vdekurish. Edhe Antikrishti do të ringjallet prej së vdekurish.

10. Karlemanje. Ky njeri u konsiderua si një luftëtar dhe burrë shteti i madh. Edhe Antikrishti do të konsiderohet si i tillë.

11. Napoleoni. Ai mendoi ta ripërtërinte Perandorinë e Shenjtë Romake, duke përfshirë ato vende, tokat e të cilave lagen nga ujërat e detit Mesdhe. Napoleoni planifikoi një mbretëri të re hebre dhe Sinedrin. Antikrishti do të realizojë shumë nga këto gjëra.

12. Kaizer Vilhelm. Ky udhëheqës i Perandorisë Gjermane kishte të njëjtin qëllim si Napoleoni. Thuhet që çdo gjeneral mbante një hartë të Perandorisë së Shenjtë Romake.

13. Musolini. Synimet e këtij njeriu ishin mjaft të qarta. Ai bëri një hartë të Perandorisë së vjetër Romake dhe përfshiu edhe Anglinë në të. Anglia protestoi, por harta mbeti. Antikrishti jo vetëm që do të bëjë një hartë, por ai do të bëjë një mbretëri me gjithë perandoritë në të.

D. Puna e Antikrishtit..

Puna e tij do të nxitet nga Satani, duke sunduar botën dhe duke u përpjekur të shkatërrojë Judeun (Isaia 10:12-27).

E. Karriera e tij.

Mbani mend që ky është tallësi dhe imituesi i Krishtit. Ai do të shpallë një rimishërim. Lindja e tij do të jetë e zakonshme dhe ai do të fillojë si një njeri i thjeshtë në çështjet e botës, por do të nxitet shumë shpejt, derisa të bëhet sundues i gjithë botës. Danieli 9:27 thekson që ai do ta “konfirmojë besëlidhjen” me hebrenjtë, domethënë do ta pranojë këtë besëlidhje me ta. Në çfarë besëlidhjeje është i interesuar Izraeli? Në Besëlidhjen Moisiane. Për periudhën e parë të Rrëmujës, tre vjet e gjysëm, hebrenjtë do të lejohen të adhurojnë në tempullin e tyre të ri. Kjo do të kishte qenë e vështirë për t’u besuar njëqind vjet më përpara, sepse atëherë vetëm një grusht hebrenjsh jetonin në Palestinë. Pa shikojeni Izraelin sot! Është i njohur si një komb dhe ka një qeveri, një ushtri, një forcë ajrore dhe po bën biznes me tërë pjesën tjetër të botës. Ka me të vërtetë qindra mijëra hebrenj prapa në tokën e tyre. Ja, Izraeli si një komb pse jeton kështu? A është ky bashkimi i fundit? A po presin ata për Mesinë? Jo. Përgjithësisht, Izraeli është kthyer në tokë në mosbesim. Izraelitët nuk e besojnë madje as Perëndinë e etërve të tyre dhe shumë më pak Mesinë e tyre të kundërshtuar. Atëherë çfarë po pret Izraeli? Ai po pret ngritjen e Antikrishtit, megjithëse nuk e di. Ai duhet të konfirmojë besëlidhjen, prandaj, Izraeli duhet të jetë një komb me të cilin Antikrishti mund të konfirmojë besëlidhjen. Ja Izraeli duke pritur Antikrishtin!

“Edhe pashë një nga krerët e saj si të plagosur për vdekje, por plaga e saj vdekjeprurëse u shërua dhe gjithë dheu u mrekullua pas bishës” (Zbulesa 13:3). Sipas këtij Shkrimi dhe Zbulesës 17, shohim që Antikrishti do të vdesë. Togu i fjalëve “plagë vdekjeprurëse” është më mirë të përkthehet me togun e fjalëve “goditje për vdekje”. Zbulesa 13:12 ka frazën “iu shërua plaga vdekjeprurëse”, që përshkruan plotësisht vdekjen dhe ringjalljen e Antikrishtit. Shihni gjithashtu Zbulesa 13:14. Pa u çuditur fare, e gjithë bota do të mrekullohet pas tij dhe do të thonë: “Kush i ngjan bishës? Kush mund të luftojë kundër saj?” (Zbulesa 13:4).

Ai do të jetë i shtati i shtatë mbretërve që do të jenë sundues të botës. Kur ai vdes dhe ringjallet, bëhet i teti sundues i botës. Bota do të ndahet në dhjetë mbretëri, të sunduara nga dhjetë sundues. “Këta kanë një qëllim dhe do t’ia japin fuqinë dhe pushtetin e tyre bishës” (Zbulesa 17:13). Pa dyshim, ai vjen në pushtetin e sundimit botëror në javën e shtatëdhjetë të Danielit. Antikrishti kërkon të adhurohet si Perëndi në këtë kohë dhe kështu ai shënon fillimin e Ditës së Zotit.

F. Koha e Antikrishtit.

Antikrishti nuk është shfaqur akoma, por është e mundur që, në dritën e ngjarjeve të sotme, ai të jetë diku tani, i gjallë në botë. Ai nuk do të shfaqet si Antikrishti, derisa të përtërihet Perandoria e vjetër romake, e përbërë nga mbretëria dhjetëkëmbëshe e Danielit 2 dhe bisha me dhjetë brirë e Zbulesës 13 dhe 17. Një gjë tjetër që duhet të ndodhë para se ai të shfaqet, është Rrëmbimi i Kishës.

G. Shfaqja e Antikrishtit.

Ai do të jetë një hebre i lindur, qytetar romak dhe sirian nga kombësia. “Nga një prej tyre doli një bri i vogël, që u bë shumë i madh në drejtim të jugut, të lindjes dhe të vendit të lavdishëm” (Danieli 8:9). Antikrishti marshon për të pushtuar kombet e Jugut, të Lindjes dhe të Perëndimit, ai nuk e pushton Veriun sepse prej andej (nga Siria) do të vijë!

H. Fundi i Antikrishtit.

“Atëherë do të shfaqet ky i paudhë, të cilin Zoti do ta shkatërrojë me hukatjen e gojës së tij dhe do ta asgjësojë me të dukurit e ardhjes së tij” (2 Thesalonikasve 2:8). Shihni edhe Zbulesa 19:20.

Kthehu tek faqja: Doktrinat e Biblës

Copyright © 2002  AlbKristian.com - Faqe të Krishtera Shqiptare
Një Projekt i Shërbesës 'Shqiptarët për Krishtin'.